На выніковым пасяджэнні апеляцыйнай інстанцыі Гомельскага абласнога суда прынята рашэнне аб тым, што на тых, каго ўлады назвалі «не занятымі ў эканоміцы», дзеянне Канстытуцыі Рэспублікі Беларусь не распаўсюджваецца. Іх жыццё, на думку гомельскіх суддзяў, мусіць рэгулявацца Дэкрэтам прэзідэнта № 3 і прызначанымі згодна з ім чыноўнікамі.
Суддзя апеляцыйнай інстанцыі Гомельскага абласнога суда Жанна Андрэйчык адхіліла прыватную скаргу «не занятай у эканоміцы» хатняй гаспадыні Марыі Тарасенка, тым самым пацвердзіўшы рашэнне суда першай інстанцыі аб адмове ёй у разглядзе «дармаедскай» скаргі з нагоды «непадведамаснасці».
У прыватнай скарзе абласному суду Марыя Тарасенка апелявалі да артыкулу 60 Канстытуцыі, які гарантуе кожнаму абарону правоў і свабодаў кампетэнтным, незалежным і неперадузятым судом. Гэта канстытуцыйная норма з'яўляецца нормай наўпроставага дзеяння. Такім чынам, і Марыя і яе прадстаўнік, вядомы праваабаронца Леанід Судаленка лічаць, што суд абавязаны быў распачаць справу, нават калі гэта не прапісана ў сумнавядомым дармаедскім Дэкрэце №3.
Юрыдычная служба прафсаюза РЭП разам з Марыяй Тарасенка пачалі стратэгічную цяжбу, куды ўваходзяць інфармацыйныя, прававыя ды іншыя дзеянні, накіраваныя на адмену Дэкрэта №3. Адмову раённага суда ў разглядзе «дармаедскай» скаргі з прычыны яе непадведамаснасці суду ў прафсаюзе РЭП называюць адмовай у правасуддзі і з гэтай мэтай заяўляюць пра намер вычарпаць усе ўнутраныя сродкі прававой абароны для таго, каб узняць гэтае пытанне на міжнародным узроўні.
На вызначэнне суда першай інстанцыі, якое ўступіла ў законную сілу, з боку Марыі Тарасенка ў бліжэйшы час будзе пададзеная скарга старшыні Гомельскага абласнога суда.