21 траўня – дзень салідарнасці з палітвязнямі ў Беларусі. Падтрымайма палітычных зняволеных!

Палеская Вясна 20.05.2022

Праваабрончым цэнтрам «Вясна» вырашана адсёлета ладзіць дзень палітвязня 21 траўня. У гэты дзень год таму ў Шклоўскай калоніі пры невысветленых дагэтуль абставінах памёр палітычны зняволены, вядомы актывіст Вітольд Ашурак.

Зараз у Беларусі 1204 палітычных зняволеных – людзей, якіх улады трымаюць за кратамі за тое, што яны мірнымі прававымі спосабамі спрабавалі змяніць палітычнае жыццё ў Беларусі – ўдзельнічалі ў мірных сходах, выказвалі свае меркаванні, збіралі і распаўсюджвалі інфармацыю. Так званыя суды над многімі палітвязнямі праходзілі ў закрытым ад грамадства рэжыме, што сведчыць пра тое, што ва ўладаў не было доказаў вінаватасці гэтых людзей нават паводле ўведзеных прыспешнікамі Лукашэнкі законаў.

Былая палітзняволеная - журналістка Кацярына Барысевіч па выхадзе з Гомельскай жаночай калоніі №4. 

У месцах зняволення да людзей, якіх кінулі за краты за палітычную барацьбу, асабліва жорсткае стаўленне. На ўзор лагераў НКВД ці нацысцкіх канцлагераў, іх прымушаюць мацаваць на адзенні і спальным месцы адмысловыя біркі жоўтага колеру, што мае быць сігналам да асаблівага стаўлення да такога вязня для кожнага супрацоўніка карнага апарату. У выніку вязняў з жоўтымі біркамі прымушаюць па некалькі разоў на дзень дакладваць свае імя, прозвішча, артыкул Крымінальнага кодэкса, за які зняволены, даты пачатку і сканчэння тэрміна. Іх нашмат часцей абшукваюць. А за любую правіну ці невыкананне ўсталяваных карнікамі правілаў такіх зняволеных змяшчаюць у штрафныя ізалятары альбо карцары.

Праваабаронцы і грамадства перадавых краінаў свету патрабуюць ад уладаў Беларусі вызваліць усіх палітычных зняволеных. Але лукашэнкаўскі дзяржапарат не рэагуе нагэтыя патрабаванні.

І дзень палітвязня закліканы звярнуць яшчэ большую ўвагу на лёсы палітычных зняволеных. Таму праваабаронцы заклікаюць усіх неабыякавых людзей далучацца да гэтага. Яны прапануюць тым, хто знаходзіцца не ў Беларусі, узяць удзел у акцыях, якія адбудуцца заўтра, 21 траўня ў Вільні, Батумі, Варшаве, Тэль-Авіве, Празе, Кракаве, Эдынбургу.


Таксама ўсім можна напісаць у сацсетках сваю гісторыю знаёмства з палітвязнем пад хэштэгам #МойСябраПалітвязень, альбо прышчапіць да адзення жоўтую бірку палітвязня. Можна напісаць адкрыты ліст-пост з хэштэгам #свабодупалітвязням. Але найбольш хацелася б, каб людзі далучыліся да напісання лістоў і паштовак палітвязням ды дапамогі іхнім сем’ям. Тым, хто знаходзіцца Беларусі можна проста абраць людзей са спісу на сайце Праваабарончага цэнтру «Вясна» і напісаць і адправіць ім ліст або паштоўку. Тыя ж, хто знаходзіцца за межамі Беларусі могуць ускарыстацца дапамогай Майстэрні паштовак салідарнасці, каб іхняя вестачка дайшла да палітычнага зняволенага ў вязніцах Беларусі і надала тым, хто церпіць за лепшую долю, натхнення і ўпэўненасці ў тым, што іхні лёс неабыякавы беларусам.

22 чэрвеня на світанні…

Жорж Кунцэвіч 09.06.2022