Цягам апошніх некалькіх тыдняў многія неабыякавыя жыхары Светлагорска далучыліся да падтрымкі людзей, зняволеных уладамі з палітычных меркаванняў.
Больш за 400 паштовак накіравалі светлагорцы ў розныя
вязніцы, дзе карныя органы ўтрымліваюць палітзняволеных. У сваіх паштоўках людзі
падтрымліваюць палітвязняў, даюць зразумець, што іхняя ахвяра не марная і рух
супраціву дыктатуры ў краіне не затух.
На жаль, пяць з адпраўленых лістоў вярнуліся назад.
Прычынай пазначана тое, што «адрасат выбыў». Відавочна, карнікі пераводзяць сваіх
вязняў з аднае ўстановы ў іншую, каб неабыякавым людзям і родзічам цяжэй было перадаваць
перадачы і ліставацца з палітвязнямі.
Але апошнімі днямі светлагорцы пачалі атрымоўваць і адказы на свае допісы. Ужо дайшлі адказы ад васьмі вязняў, у тым ліку ад Уладзіміра Цыгановіча – вядомага блогара MozgOn. Уладзімір напісаў каротка - «Я ок!» і пажадаў усяго найлепшага.
Станам на 3 верасня ў Беларусі палітычнымі зняволенымі прызнаныя 653 чалавекі.
Ім патрэбна наша падтрымка!
