Пад палітычныя рэпрэсіі трапіў адзін з самых паважаных у горадзе лекараў, паведаміла Гомельская Вясна.
Андрэй КУРЛОВІЧ.
Суд над Андрэем Міхайлавічам Курловічам запланаваны на 19 лістапада. Выконваць палітычную рэпрэсію будзе Юрый Лунцэвіч, якога асабіста Лукашэнка прызначыў на пасаду суддзі ў Рэчыцу. Карнік выстаўляе Андрэю Курловічу абвінавачванне ў распаўсюдзе, вырабе, захоўванні інфармацыйнай прадукцыі, якая ўтрымлівае заклікі да экстрэмісцкай дзейнасці альбо прапагандуе такую дзейнасць і збіраецца судзіць паводле часткі 2 артыкула 19.11 Кодэкса аб адміністрацыйных правапарушэннях.
Юліяна ЛУНЦЭВІЧ.
Падобныя абвінавачванні ўлады Беларусі звычайна выстаўляюць
людзям за падпіскі на альтэрнатыўныя дзяржаўным крыніцы інфармацыі, рэпосты з
гэтых крыніц у сваіх сацыяльных сетках, альбо падабайкі ў некаторых сацсетках,
дзе ўпадабаны матэрыял адлюстроўваецца ў стужках сяброў. Цяпер карныя органы
Беларусі без якіх-кольвек абгрунтаванняў для грамадства паабвяшчалі практычна
ўсе альтэрнатыўныя ўбудаваным у сістэму ўлады крыніцы інфармацыі экстрэмісцкімі
матэрыяламі і караюць за любыя дачыненні з такімі крыніцамі.
Пры гэтым, артыкулам 19 Усеагульнай дэкларацыі правоў чалавека, кожнаму чалавеку ў свеце гарантуецца права на свабоду шукаць, атрымлiваць i распаўсюджваць iнфармацыю i iдэi любымi сродкамi i незалежна ад дзяржаўных межаў. Пераслед за распаўсюд інфармацыі з нейкіх крыніц з’яўляецца грубым парушэннем гэтага права.
Скрын-шот з сайта Рэчыцкай цэнтральнай раённая лякарні.
Андрэй Курловіч працуе загадчыкам
анэстэзійна-рэанімацыйнага аддзялення Рэчыцкай цэнтральнай раённай лякарні. У
горадзе і раёне ён вядомы як адзін з найбольш прафесійных лекараў.
“Многія ўважлівыя чытачы добра ведаюць, каму часцей за ўсё на старонках газеты адрасавалі словы падзякі рэчычане, якіх медыкі літаральна вырывалі з чэпкіх абдымкаў каранавіруса. Правільна, Андрэю Курловічу, загадчыку аддзялення анестэзіялогіі і рэанімацыі Рэчыцкай ЦРБ”,
– пісала пра яго ў 2022 годзе дзяржаўная раённая газета.
Невядома, ці застанецца пасля палітычна матываванага
адміністрацыйнага прысуду на працы паважаны лекар – вельмі часта гэта служыць
падставай для звальнення з дзяржаўных арганізацыяў. Але пакуль ягонае імя не
прыбранае з сайта рэчыцкай лякарні.
А. Юрэвіч.
