Штотыднёвая акцыя прайшла 10 траўня на цэнтральнай плошчы Светлагорска без здарэнняў, але з новымі ўдзельнікамі.
Распачыналіся сходы светлагорцаў на плошчы як выказванне сваёй нязгоды з пабудовай і запускам у горадзе шкоднага завода беленай цэлюлозы. Гэтае прадпрыемства, якое пачынала будаваць кітайская карпарацыя САМСЕ, але скончвалі беларускія прадпрыемствы, на працягу некалькіх гадоў выкідвае ў паветра Светлагорска небяспечныя рэчывы. Іх пах перыядычна адчуваеца і цяпер у розных раёнах горада і прыгараднай вёскі Якімава Слабада. У многіх жыхароў утрыманне метылмеркаптану ў паветры выклікала разлады здароўя.
Апошнім часам пачасціліся выкіды невядомага парашкападобнага рэчыва. У ноч з 1 на 2 траўня такі выкід «накрыў» Светлагорск. Бела-шэры налёт з’явіўся на аўтамабілях, што стаялі на вуліцы, яго і дагэтуль добра бачна на розных цёмных паверхнях.
Менавіта з абмеркавання гэтага выкіду і пачалася сустрэча жыхароў горада падчас кармлення галубоў 10 траўня. Каардынатарка ініцыятыўнай групы за чыстае паветра ў Светлагорску Алена Маслюкова паведаміла, што дзяржаўныя кантралюючыя органы адмаўляюцца рабіць аналіз гэтага рэчыва. Таму, варта самім арганізаваць вывучэнне хімічнага складу парашка, што сыплецца з неба ў Светлагорску. Яна звярнулася да тых, хто прыйшоў на сустрэчу, з прапановай сабраць як мага больш гэтага рэчыва ды звязацца з ёй праз сацыяльныя сеткі, каб перадаць яго на аналіз у адпаведную лабараторыю.
Варта заўважыць, што хваля рэпрэсіўных затрыманняў жыхароў розных гарадоў краіны за ўдзел у мірных сходах, паклікала 10 траўня на светлагорскую плошчу і новых удзельнікаў, якіх раней тут не бачылі. Усяго «карміць галубоў» на плошчы сабралася каля паўтара дзясятка чалавек. Некаторыя былі з дзецьмі. Паступова размовы перайшлі да сітуацыі з правамі чалавека. У прыватнасці людзі абмяркоўвалі сваё права на свабоду слова і свабоду мірных сходаў у кантэксце карных захадаў улады за тое, што жыхары іншых гарадоў выказвалі сваю пазіцыю ў відэа, якія здымаў зняволены блогер Сяргей Ціханоўскі, што мае намер балатавацца на прэзідэнта краіны.
Магчымасць мірнай змены ўлады праз выбары таксама стала адной з тэмаў, якія абмяркоўвалі людзі. Практычна ўсе выказвалі сумнеў у тым, што вынікі маючых адбыцца выбараў прэзідэнта будуць аб’ектыўнымі.
Таксама падчас сустрэчы прагучала прапанова тым, хто мае
такую магчымасць, на валанцёрскіх пачатках паўдзельнічаць у пашыве ахоўнага
адзення для медыкаў. Для гэтага неабходна мець мінімальныя кравецкія навыкі і
адпаведную машынку. Гатовы раскрой ужо падрыхтаваны.
Каля гадзіны доўжылася сустрэча жыхароў гораду з «кармленнем галубоў». Апошнія, дарэчы, з’елі кілаграм аўсяных шматкоў. Здалёку за сходам назіраў супрацоўнік міліцыі і некалькі разоў побач праходзілі людзі ў цывільным, якія пільна ўглядаліся ва ўдзельнікаў сустрэчы. У адрозненне ад аналагічнай акцыі ў той жа дзень у Берасці, у Светлагорску ўлады нікога не затрымлівалі.
