Інцыдэнт, за які асудзілі петрыкоўца, адбыўся ў лістападзе мінулага года. Тады да ягонага брата прыйшлі з ператрусам некалькі карнікаў з мясцовай філіі МУС. Яны шукалі нейкія бензапілы.
Брат патэлефааваў Дзмітрыю
Ляўковічу і паведаміў, што ў ягоным падворку адбываецца ператрус. Дзмітрый
прыехаў і пачаў здымаць тое, што адбываецца ў прыватнай уласнасці брата, на
відэакамеру.
Даведка: Згодна з артыкулам 5 лукашысцкага Закона «Аб органах унутраных справаў», дзейнасць органаў унутраных справаў з'яўляецца галоснай, адкрытай для грамадзян і сродкаў масавай інфармацыі ў той меры, у якой гэта не супярэчыць патрабаванням крымінальна-працэсуальнага заканадаўства, заканадаўства, якое вызначае парадак адміністрацыйнага працэсу, заканадаўства аб аператыўна-вышуковай дзейнасці, аб персанальных дадзеных, аб абароне дзяржаўных сакрэтаў, аб інфармацыі, інфарматызацыі і абароне інфармацыі.
Невядома, што такога, за што было б сорамна потым міліцыянтам, яны збіраліся рабіць на падворку Ляўковіча старэйшага, але яны ані не хацелі, каб брат абшукваемага здымаў іхнія, нібыта законныя, дзеянні на відэа. У выніку ўсчалася штурханіна, падчас якой двое карнікаў павалілі Дзмітрыя на зямлю, закруцілі рукі, і адзін з лукашыстаў пачаў з асаблівай жорсткасцю біць яго нагой у галаву, якую той спрабаваў узняць з халоднай лістападаўскай зямлі. Таксама міліцыянты ўжылі да чалавека, які ажыццяўляў сваё права на збор і распаўсюд інфармацыі, пярцовы газ, а той, што збіваў яго, яшчэ і дастаў пісталет і пачаў пагражаць іншым сваякам. Гэта ўсё трапіла, усё ж, на відэа (увага, прысутнічае ненарматыўная лексіка!), якое пазней было змешчана на YouTube-канале Ляўковіча.
Скрын-шоты з відэа, знятага Ляўковічам.
Пасля такога жорсткага затрымання Дзмітрыя Ляўковіча завезлі ў лякарню са
страсеннем мазгоў ды мноствам гематомаў. Пасля таго, як ён ачуняў, яго ўлады
зняволілі на 15 содняў за непадпарадкаванне міліцыянтам. Увесь тэрмін
зняволення ён адбыў.
Сёлета ў жніўні распачаўся суд паводле артыкула 369 Крымінальнага кодэксу. Міліцыянты, якія збілі Дзмітрыя, адчулі сябе абражанымі тым, што падчас збіцця, ён крыкнуў «Адпусціце, п***ры!». Пацярпелымі аказаліся дое супрацоўнікаў карнага органу лукашэнкаўскага рэжыму, якія маюць прозвішчы Аскерка і Сярапін. Яны звярнуліся ў суд з заявай аб абразе. Акрамя таго, што ім карцела прыцягнуць Ляўковіча да крымінальнай адказнасці, яны яшчэ і запатрабавалі ад яго кампенсацыю маральнай шкоды па 500 рублёў кожны.
Скрын-шот з відэа, знятага Ляўковічам.
Пракурорка Фіцнер запатрабавала для Ляўковіча пакаранне ў выглядзе 1,5 года
абмежавання волі з накіраваннем у папраўчую ўстанову адкрытага тыпу. Але ў
выніку яму суддзя Федаровіч прысудзіў 2 гады абмежавання волі без накіравання ў
ПУАТ.
