У Мазыры з палаты анкадыспансера затрымалі кіраўніка філіі ПЦ «Вясна»

Палеская Вясна 24.03.2021

Учора праваабаронцу зрабілі аперацыю і ён мусіў праходзіць рэабілітацыю, але сёння сілавікі забралі яго проста з бальнічнай палаты і павезлі ў Следчы камітэт.

Як паведаміў журналістам Палескай Вясны сам кіраўнік Мазырскай філіі Праваабрончага цэнтру «Вясна» Уладзімір Целяпун, калі 15.30 да яго ў палату ў Мазырскім анкадыспансеры ўвайшлі прадастаўнікі карных органаў і загадалі праехаць з імі. Яго павезлі ў Мазырскі райаддзел Следчага камітэта.

22 сакавіка Уладзімір Целяпун мусіў легчы ў лякарню, а 23-га яму зрабілі анкалагічную аперацыю. Нягледзячы на тое, што пасля аперацыі мінуў толькі адзін дзень, сілавікі забралі яго проста з бальнічнага ложку.

Хутчэй за ўсё следчыя маюць правесці допыт Уладзіміра Целепуна ў крымінальнай справе аб арганізацыі групавых дзеянняў, якія груба парушаюць грамадскі парадак, паводле артыкула 342 Крымінальнага кодэкса. У межах гэтай справы 16 лютага ў праваабронцаў «Вясны» і некаторых іншых праваабрончых арганізацыяў, а таксама ў незалежных журналістаў прайшлі ператрусы. Сілавікі паведамілі пра ператрусы ў блізу 90 чалавек па ўсёй краіне. У тым ліку ператрус прайшоў і ў кватэры і лецішчы Уладзіміра Целепуна.

Таксама каля 17 гадзіны 24 сакавіка міліцыянты ўручылі позвы з выклікам у Следчы камітэт на 25 сакавіка кіраўніку Рэчыцкай філіі ПЦ «Вясна» Валеру Пуціцкаму і незалежнаму журналісту-фрылансеру з Рэчыцы Андрэю Мядзведзеву. У позвах не пазначана ў якасці каго і ў якой справе іх выклікаюць.