Мірныя сходы. За несанкцыянаваныя ўлады караюць, а заяўленыя не санкцыянуюць

Палеская Вясна 17.03.2021

>

Мазырскі райвыканкам адмовіў жыхарам горада ў правядзенні пікетаў у красавіку і траўні.

Усе ўжо прызвычаіліся, што ў Беларусі ледзьве не штодзень кагосьці караюць за парушэнне парадку арганізацыі і правядзення так званых масавых мерапрыемстваў. Прычым, карнікі лічаць масавымі мерапрыемствамі нават фіранку ў белых і чырвоных колерах на балконе альбо раскрыты парасон такой расфарбоўкі ў дождж. Пры гэтым, часцяком самі супрацоўнікі карных органаў тлумачаць, што не варта парушаць закон, а трэба звярнуцца да мясцовай улады і атрымаць санкцыю на правядзенне такога мерапрыемства.

Менавіта так і зрабіла жыхарка Мазыра Лілія Малыга. Яна папрасіла ў мясцовага райвыканкама дазволу на правядзенне пікетаў у цэнтры горада каля крамы «Белкніга» кожную нядзелю ў красавіку і траўні, каб мець легальную магчымасць выказваць свае меркаванні пра сітуацыю ў краіне. Сваю заяву яна аформіла ў поўнай адпаведнасці з патрабаваннямі закона аб масавых мерапрыемствах.

Але Мазырскі райвыканкам у асобе намесніка ягонага старшыні Фелікса Галюка чакана адмовіў у заяўцы на ўсе даты. Пры гэтым нейкіх прымальных абгрунтаванняў не прывёў. Спаслаўся на сваё рашэнне ад 2011 года, якім ён вызначаў месцы для правядзення масавых мерапрыемстваў у паведамляльным парадку. Іх на ўвесь Мазырскі раён вызначана аж два. І абодва – на стадыёнах: у самім Мазыры гэта стары стадыён «Спартак» і ў прыгараднай вёсцы Козенкі таксама тамтэйшы стадыён. Праўда месцы гэтыя схаваныя ад людскіх плыняў і наўрад ці нейкія меркаванні, якія там выказваліся б, нехта пачуў.


Малыга не спрабавала заявіць пра мерапрыемства ў паведамляльным парадку, а прасіла дазволу на мерапрыемства там, дзе яна лічыць больш мэтазгодным. Выканкам жа, не знайшоўшы нейкіх зачэпак у заяўцы, адмовіў прыплёўшы ў адказе тое, што заяўленае месца не належыць да вызначаных для мерапрыемстваў, што ладзяцца ў паведамлльным парадку.

Такім чынам Мазырскі райвыканкам пазбавіў заяўніцу гарантаванага Канстытуцыяй, Усеагульнай дэкларацыяй правоў чалавека і Міжнародным пактам аб грамадянскіх і палітычных правах права на выказванне свайго меркавання праз пікетаванне. Калі ж яна парушыць адмову выканкама і сваё меркаванне выкажа, паводле новага Кодэкса аб адміністрацыйных правапарушэннях яе чакае да 200 базавых вялічыняў штрафу (гэта на цяперашнія грошы 5 800 рублёў альбо больш за 1 900 еўра), адміністрацыйны арышт альбо грамадскія працы.   

22 чэрвеня на світанні…

Жорж Кунцэвіч 09.06.2022