>
29-гадовага
маладзёна абвінавачваюць у арганізацыі групавых беспарадкаў, спалучаных з
непадпарадкаваннем міліцыянтам.
Затрыманне жыхара Рэчыцы Максіма Ялканава праводзілі супрацоўнікі Гомельскага абласнога ўпраўлення ГУБАЗіК. Інфармацыю аб затрыманні пацьвердзіў тэлеграм-канал МУС Беларусі. Паводле сілавікоў, Максім Ялканаў у жніўні мінулага года «падчас несанкцыянаваных масавых мерапрыемстваў у Рэчыцы і Гомелі арганізаваў групавыя беспарадкі, спалучаныя з непадпарадкаваннем міліцыянтам».
Міліцыянты паведамляюць, што Максім Ялканаў з’яўляецца прыхільнікам
неанацысцкай ідэалогіі. Але, як удалося даведацца Палескай Вясне ў знаёмых
Максіма, яны ніколі не заўважалі за ім нейкіх паводзінаў, якія б сведчылі пра
ягоную прыхільнасць да неанацызму.
Паводле інфармацыі Палескай Вясны, Максіма Ялканава затрымалі на працы 9
сакавіка. Яго папрасілі праехаць для гутаркі да следчага, але на волю ён так і
не выйшаў. Увечары 10 сакавіка з’явілася інфармацыя МУС пра ягонае затрыманне.
Нягледзячы на тое, што ў пачатку паведамлення МУС Ялканава абвінавачваюць у
арганізацыі масавых беспарадкаў (артыкул 293 Крымінальнага кодэкса), у рэшце
міліцыянты пішуць, што ў дачыненні да яго завялі крымінальную справу аб
арганізацыі і падрыхтоўцы дзеянняў, якія груба парушаюць грамадскі парадак і спалучаныя
з адкрытым непадпарадкаваннем прадстаўнікоў улады. Гэтае злачынства
прадугледжана артыкулам 342 Крымінальнага кодэкса. Зараз Максім Ялканаў
зняволены ў ІЧУ ў Гомелі.
