У Мазыры і Светлагорску масава выклікаюць у Следчы камітэт людзей для допытаў у справе ПЦ «Вясна»

Палеская Вясна 06.03.2021

Следчыя спрабуюць даведацца, ці плацілі кіраўнікі філіяў у палескіх гарадах за выкліканых у якасці сведкаў штрафы і дзяржпошліны пры абскарджванні рэпрэсіўных прысудаў.

Паводле інфармацыі, якая трапіла журналістам Палескай Вясны, допыты праводзяць следчыя абласнога ўпраўлення СК. Яны карыстаюцца забранымі падчас ператрусаў на кватэрах і ў офісах рэгіянальных філіяў 16 лютага копіямі дакументаў па абскарджванні прысудаў паводле артыкула 23.34. Менавіта гэтыя дакументы і з’яўляюцца падставай для выкліку людзей на допыты.

Следчыя задаюць пытанні пра тое, хто аплачваў штрафы, хто аплачваў пошліны пры абскарджванні. Яны прад’яўляюць людзям копіі квіткоў пра аплату і прымушаюць узгадваць пры якіх абставінах адбывалася аплата. У прыватнасці, у Мазыры следчыя наўпрост задаюць пытанні пра тое, што звязвае выкліканых на допыт людзей з кіраўніком Мазырскай філі ПЦ «Вясна» Уладзімерам Целепуном. У Светлагорску падобныя пытанні задаюць адносна кіраўніцы светлагорскай філіі Алены Маслюковай.

Акрамя таго, усіх прымушаюць даваць падпіску аб неразгалошванні, каб зрабіць так званае расследаванне максімальна закрытым. Як вядома, у апошні час шмат судоў у крымінальных справах, звязаных з палітычным пераследам, адбываюцца таксама ў закрытым рэжыме.

Станам на 5 сакавіка Палескай Вясне вядома самамала пра 6 чалавек, якіх выклікалі на допыты ў справе «Вясны» ў Мазыры і амаль 10 чалавек у Светлагорску.

5 сакавіка Рада Праваабарончага цэнтру «Вясна» прыняла заяву наконт узбуджэння і расследавання ў дачыненні да арганізацыі крымінальнай справы паводле артыкула 342 Крымінальнага кодэкса (арганізацыя і актыўны ўдзел у групавых дзеяннях, якія груба парушаюць грамадскі парадак). Юрыст Гомельскай філіі ПЦ «Вясна» Леанід Судаленка зняволены ўладамі і з’яўляецца абвінавачаным паводле гэтай справы. Таксама ў зняволенні знаходзяцца кіраўніца валанцёрскай службы «Вясны» Марфа Рабкова і валанцёры Таццяна Ласіца і Андрэй Чапюк.


«Грамадскае аб’яднанне Праваабарончы цэнтр “Вясна”, якое ў красавіку гэтага года будзе адзначаць 25-годзе сваёй дзейнасці, з’яўляецца добраахвотным аб’яднаннем грамадзянаў, якія дзейнічаюць у адпавденасці з Дэкларацыяй аб праве і абавязках асобных асобаў, груп і органаў грамадства заахвочваць і абараняць агульнапрызнаныя правы чалавека і асноўныя свабоды, якая гарантуе права кожнага індывідуальна альбо ў групе асобаў абараняць правы іншых. Такая дзейнасць цалкам адпавядае Канстытуцыі Беларусі і павінна быць гарантаваная з боку дзяржавы.


Мы расцэньваем пачатак крымінальнага пераследу па факце дзейнасці ПЦ “Вясна” як чарговы пераслед у сувязі з нашай актыўнай праваабарончай дзейнасцю з боку існуючага аўтарытарнага палітычнага рэжыму А. Лукашэнкі, які адбываецца на фоне беспрэцэдэнтных рэпрэсій у краіне.


Гэтыя дзеянні ўладаў Беларусі груба парушаюць шэраг міжнародных пагадненняў, удзельнікам якіх з'яўляецца і Рэспубліка Беларусь, у прыватнасці, Міжнароднага Пакта аб грамадзянскіх і палітычных правах, Дэкларацыі аб праве і абавязкі асобных асоб, груп і органаў грамадства заахвочваць і абараняць агульнапрызнаныя правы чалавека і асноўныя свабоды, Кіруючых прынцыпаў АБСЕ па абароне праваабаронцаў, Кіруючых прынцыпаў па свабодзе аб'яднанняў.


Мы выказваем свой пратэст у сувязі з чарговымі рэпрэсіямі ў дачынні да нашай арганізацыі і яе сябраў. Мы ніколі не спынім сваёй законнай праваабарончай дзейнасці на карысць усяго беларускага грамадства, скіраванай на прасоўванне ідэй і каштоўнасцяў правоў чалавека і дэмакратыі»
, ­– гаворыцца ў заяве арганізацыі. 

22 чэрвеня на світанні…

Жорж Кунцэвіч 09.06.2022