У Мазыры завялі крымінальную справу на адмністратара YouTube-каналу «Мозырь для жизни» Аляксандра Цуканава

Палеская Вясна 08.02.2021

Актывіста каманды «Страна для жизни» вінавацяць у паклёпе.

Як паведаміў Палескай Вясне сам Аляксандр Цуканаў, 5 лютага у кватэру да ягонай маці прыйшлі міліцыянты з ператрусам. Яны забралі з кватэры два ноўтбукі – адзін, які належаў Аляксандру, другі – ягонай маці.

Як паведаміла маці Аляксандра Цуканава, ёй прад’явілі пастанову на ператрус у межах крымінальнай справы, паводле артыкулу 188 Крымінальнага кодэкса – нібыта за паклёп на адрас начальніка Мазырскага РАУС Міхаіла Сінельнікава, дырэктаркі сярэдняй школы № 5 Мазыра і старшыні ўчастковай выбарчай камісіі падчас апошніх прэзідэнцкіх выбараў Алены Нерэд і нейкага чалавека з прозвішчам Самойленка.

Сам Аляксандр Цуканаў вымушаны быў эвакуявацца з Беларусі, паміж зняволненнямі, калі ў жніўні мінулага году пачаліся масавыя затрыманні актывістаў каманды «Страна для жизни», у тым ліку і ў Мазыры. Зараз ён знаходзіцца ў Літве.

Паводле інфармацыі ад маці Аляксандра, падчас ператрусу міліцыянты заявілі, што рыхтуюцца дакументы на адрас Літвы на экстрадыцыю Аляксандра Цуканава ў Беларусь.