>
24 лістапада Еўрапарламент прыняў рэзалюцыю аб правах
чалавека ў Беларусі. Яна называецца «Аб рэпрэсіях, якія працягваюцца ў
Беларусі супраць дэмакратычнай апазіцыі і грамадзянскай супольнасці».
У рэзалюцыі адзначана, што Еўрапарламент прымае пад ўвагу даклад Анаіс Марын, спецыяльнай дакладчыцы ААН
па правах чалавека ў Беларусі, а таксама апошнія заявы ААН, АБСЕ, «Групы сямі»
і Еўрапейскай службы знешніх дзеянняў. Канстатуецца, што парушэнні правоў
чалавека і пераслед па палітычных прычынах у Беларусі працягваюцца.
Еўрапарламент выказаў салідарнасць народу Беларусі, заявіў
аб падтрымцы дэмакратычнай апазіцыі і грамадзянскай супольнасці, якія
працягваюць выступаць за свабодную, суверэнную і дэмакратычную Беларусь.
Дэпутаты Еўрапарламента нагадалі, што Еўрапейскі Саюз і
краіны, якія ўваходзяць у яго, не прызнаюць вынікі прэзідэнцкіх выбараў 2020 г.
у Беларусі з-за масавых фальсіфікацый, і не прызнаюць А. Лукашэнку прэзідэнтам. Яны заклікалі да працягу падтрымкі
беларускіх дэмакратычных сіл і грамадзянскай супольнасці.
У рэзалюцыі называюцца прыклады нядаўніх палітычных
працэсаў у беларускіх судах, у тым ліку прызначэнне першага завочнага судовага
працэсу. Еўрапейскія дэпутаты асуджаюць прыгаворы па справе палітычнага
зняволенага Мікалая Аўтуховіча, і
патрабуюць вызвалення ўсіх палітзняволеных.
Еўрапарламент рашуча асуджае ўдзел уладаў Беларусі ў агрэсіі
Расіі супраць Украіны, размяшчэнне расійскіх войск у Беларусі і ваяўнічыя
выказванні беларускіх уладаў. У рэзалюцыі падкрэслена, што Лукашэнка разам з іншымі звязанымі з ім асобамі таксама нясуць адказнасць
за ваенныя злачынствы ва Украіне, і павінны адказваць перад міжнародным
трыбуналам і Міжнародным крымінальным судом.
У рэзалюцыі таксама асуджаюцца спробы Лукашэнкі падарваць беларускую культуру
і русіфікаваць беларускі народ, і выказана шкадаванне адносна рашэння
беларускага МУС лічыць заклік «Жыве Беларусь!» нацысцкім.
Еўрадэпутаты заявілі аб вітанні прысуджэння Нобелеўскай
прэміі міру беларускаму праваабаронцу, які знаходзіцца ў зняволенні, Алесю Бяляцкаму (выхадцу з Гомельшчыны).
Яны заклікаюць вызваліць яго да цырымоніі ўручэння прэміі. Дэпутаты выказваюць
падтрымку іншым палітзняволеным з
Праваабарончага цэнтра «Вясна».
У рэзалюцыі вітаецца стварэнне Кантактнай групы па
супрацоўніцтве з беларускім грамадствам у Савеце Еўропы. Дэпутаты заклікалі ўстановы
Еўрасаюза і краіны ЕС, а таксама міжнародныя
арганізацыі ўзмацняць сістэматычнае супрацоўніцтва з дэмакратычнымі сіламі
Беларусі.
Еўрапарламент заклікае дапамагаць беларусам, якія
вымушана апынуліся за межамі сваёй краіны, у тым ліку прадстаўнікам
дэмакратычных сіл, грамадзянскай супольнасці, прафсаюзаў, праваабарончых
арганізацый і СМІ. Еўрадэпутаты заклікалі Еўрапейскую Камісію і краіны-члены ЕС
падрыхтаваць працэдуру разгляду спраў беларусаў, якіх беларуская ўлада можа пазбавіць
беларускага грамадзянства. Таксама ў рэзалюцыі заклікаецца аказваць падтрымку беларусам,
якія пражываюць у ЕС, у якіх закончваецца тэрмін дзеяння дакументаў, якія
сведчаць асобу, і якія не могуць вярнуцца ў Беларусь для іх падаўжэння.
Рэзалюцыя Еўрапарламента будзе накіравана ў Еўрапейскі Савет,
Еўракамісію, Еўрапейскую службу знешніх дзеянняў, парламентам і ўрадам краін
Еўрасаюза, Раду Еўропы, АБСЕ, прадстаўнікам беларускіх дэмакратычных сіл, а
таксама ўладам Беларусі і Расіі.
