>
У судзе Мазырскага раёна на 11 студзеня прызначаны
разгляд крымінальнай справы палітвязня Яўгена Віславуха, якога абвінавачваюць у
абразе прадстаўніка ўлады паводле арт. 369 Крымінальнага кодэкса.
Гэта яшчэ адна крымінальная справа, заведзеная на
палітвязня. Першы прысуд палітвязню быў вынесены 19 верасня па трох артыкулах
Крымінальнага кодэкса: ч. 1 арт. 130 “распальванне расавай, нацыянальнай,
рэлігійнай альбо іншай сацыяльнай варожасці альбо варажнечы”, ч. 3 арт. 203-1
“Незаконныя дзеянні ў адносінах інфармацыі аб прыватным жыцці і персанальных
дадзеных” і арт. 369 “абраза прадстаўніка ўлады”.
Судзілі яго ў Гомельскім абласным судзе. Быў асуджаны на
3,5 гады пазбаўлення волі і 4,2 тыс. рублёў. Справу вёў суддзя Анатоль Сотнікаў.
Новы суд мусіў распачацца яшчэ 1 снежня 2022 года, аднак
яго перанеслі на 11 студзеня. Справу будзе разглядаць суддзя Галіна
Кніжонак у закрытым рэжыме.
Нагадаем, палітзняволенага з Мазыра Яўгена Віславуха 23
снежня КДБ Беларусі уключыў у спіс "Асоб, якія маюць дачыненне да
тэрарыстычнай дзейнасці".
