28 сакавіка суддзя апеляцыйнай інстанцыі Гомельскага абласнога суда Жанна Андрэйчык пачала разгляд прыватнай скаргі хатняй гаспадыні Марыі Тарасенка на дзеянні суда чыгуначнага раёна Гомеля, які адмовіў жанчыне ў праве звярнуцца па судовую абарону сваіх правоў. Чыгуначны суд спаслаўся на тое, што ў Дэкрэце прэзідэнта № 3 не прапісана, што спрэчкі пра ўнясенне ў спісы "не занятых у эканоміцы" мусяць разглядацца ў судах.
Як паведамляе сайт Гомельская Вясна, на паседжанні апеляцыйнаяй інстанцыі абласнога суда пасля апытання самой заяўніцы і яе прадстаўніка - прававога інспектара працы прафсаюза РЭП Леаніда Судаленкі, суддзя ўзяла тайм-аўт. Наступнае паседжанне па скарзе не занятай у эканоміцы хатняй гаспадыні адбудзецца 11 красавіка.
У прыватнай скарзе абласному суду Марыя Тарасенка апелюе да артыкула 60 Канстытуцыі, які гарантуе кожнаму абарону правоў і свабодаў кампетэнтным, незалежным і бесстароннім судом. Гэта канстытуцыйная норма з'яўляецца нормай наўпроставага дзеяння. Такім чынам, і Марыя і яе прадстаўнік лічаць, што суд абавязаны быў распачаць справу, нават калі такое права для "незанятых у эканоміцы" не прапісана ў сумна вядомым, так званым "дармаедскім" Дэкрэце №3.
Нагадаем, суд Чыгуначнага раёна Гомеля адмовіў Марыі Тарасенка і ў спагнанні маральнай шкоды паводле яе пазову да так званых "дармаедскіх" камісіяў. У гэтай справе таксама цяпер рыхтуецца апеляцыйная скарга ў абласны суд.
Фота: Андрэй СТРЫЖАК
