>
Прэм’ера дакументальнага фільма “Ня быць скотам” пра
складаныя лёсы праваабаронцаў адбылася сёння на “Маланка. Медыя”. Фільм
з’яўляецца працягам плённай супрацы кінадакументалістаў з Праваабарончым
цэнтрам “Вясна”.
“Пасля падзей 2020 года многія з тых, хто дапамагаў
беларусам адстойваць іх правы, апынуліся ў турме. Сябры і калегі кіраўніка ПЦ
"Вясна" Алеся Бяляцкага, якія як і легендарны праваабаронца апынуліся
пад рэпрэсіямі, але змаглі выехаць з краіны, цяпер актыўна аднаўляюць працу
арганізацыі. Яны кажуць, што праваабарона – гэта не прафесія, а стыль
жыцця. Нават патрапіўшы ў кацёл вайны ва Украіне, яны працягнулі дапамагаць
людзям. Нягледзячы на тое, якой небяспецы падвяргаліся іх жыцці. Сёння нашы
героі знаходзяцца ў Літве, дзе шум імклівых грамадзянскіх самалётаў і залпы
святочных феерверкаў ўсё яшчэ нагадваюць аб авіяўдарах па мірных гарадах. А
былы будынак КДБ, пераўтвораны ў музей акупацыі і барацьбы за свабоду, а
таксама парк савецкай гісторыі пад Друскінінкаем зусім не здаюцца артэфактамі
далёкага мінулага. Што значыць для беларуса "Ня быць скотам" і як не
трапіць у пастку самых страшных старонак гісторыі, расказваем у новым фільме
Маланка.Doc”, – гаворыцца ў анатацыі да фільма.
Фільм распавядае пра працу ў эміграцыі некалькіх праваабаронцаў Праваабарончага цэнтра "Вясна", якія сталі двойчы бежанцамі. Спачатку праз пераслед яны павінны былі выехаць з Беларусі ва Украіну, а потым вайна іх выгнала ў Літву.
Героямі фільма сталі, у тым ліку, і праваабаронцы Гомельшчыны.
Аўтары дакументальнай стужкі плануюць прадставіць фільм на
некалькіх міжнародных праваабарончых кінафестывалях.
