>>
Суд Мазырскага раёна 7 верасня вынес прысуд палітзняволенаму
Яраславу Пашкову. Яго абвінавацілі ў дыскрэдытацыі Рэспублікі Беларусь (арт.
369-1 Крымінальнага кодэкса) і абразе прэзідэнта (ч. 1 арт. 368).
Справу разглядала суддзя Галіна Кніжонак-Максімава.
Яраслаў
Пашкоў быў затрыманы 30 верасня 2021 года па крымінальнай справе,
узбуджанай за каментары ў інтэрнэце пасля гібелі ў мінскай кватэры супрацоўніка
КДБ Дзмітрыя Федасюка і it-спецыяліста Андрэя Зельцэра. Аднак пад час
следства дадалі новае абвінавачанне.
Да суда ўтрымліваўся ў СІЗА № 3 Гомеля.
У лісце на волю Яраслаў напісаў, што 3
сакавіка 2022 г. памерла ягоная маці.
Жыхар райцэнтра ў сацыяльных сетках пакідаў каментары
абразлівага характару ў дачыненні да Лукашэнкі. Таксама хлопец абвінавачваўся ў
здзяйсненні дзеянняў, якія дыскрэдытуюць Беларусь, піша "Вясна".
Судовы працэс пачаўся 30 жніўня.
У судзе віна Пашкова была цалкам даказаная. Яму
прысудзілі пазбаўленне волі тэрмінам на адзін год і 9 месяцаў у калоніі агульнага
рэжыму. Акрамя гэтага, па рашэнні суда ён павінен заплаціць штраф у
памеры 100 базавых велічынь (3200 рублёў).
На фота: Яраслаў Пашкоў.
